大專罷課│Canteen得番三個餐，係咪食住先？

有票，真係唔要？咁有飯，係咪真係唔食？

中大新聞與傳播學院政改關注組在Youtube上載了一條《如果MEDCAN只有三個餐》的紀錄片，負責製作的學生情商MEDCAN（即醫學樓飯堂）的事頭婆May姐幫手，將餐牌改為只剩三個餐，分別是「奄列套餐配雞扒多士」、「雞扒套餐配奄列多士」，以及「多士套餐配雞扒奄列」……即係話，其實三個餐都冇分別，以比喻假普選中只得三個無分別的特首候選人。

製作團隊再放置隱蔽的鏡頭拍攝學生的反應，有學生見到後無奈離去，有學生忍不住講「咁即係有咩分別？」，受訪時更問「我講唔講得粗口架？」

面對這樣不公平的情況，同學係咪都會食住先？有同學就直言，三個都唔會揀，正如普選一樣，一定要爭取一個更公平的制度，所以支持學生罷課。