你認為特首梁振英第二份《施政報告》值幾多分?

Angelina

-空中飛傭

空中小姐,其實即係空中飛傭,只係一個在飛機上工作的傭工,你睇我好,我睇你好,其實是他也是你和我,打份工啫,得閒咪上嚟講吓是非囉。

Angelina網誌│空姐的一天:elegant還是elephant?

2014-1-25 13:30
字體: A A A

寫了5篇blog,其實都還未正式介紹「空姐」這個職業,今日就講幾句吧。

好多人都覺得,空姐 = 靚女 = elegant。身為一個空姐,我當然很歡迎有此想法,但其實,點解大家都覺得空姐好elegant?我諗係因為大家成日喺機場或巴士站,見到我哋着住套制服,扭吓扭吓又拉住個喼咁,望落去的確係幾elegant!

不過,所謂嘅elegant,其實就只限於「扭吓扭吓又拉住個喼」嗰一個moment。

當我哋上到機,收好自己啲行李再開始工作時,沒有誇張,空姐啲手腳真係快過佐敦茶餐廳啲阿哥,仲隨時隨地可以發揮力的表現!

我哋喺飛機上嘅工作,基本上大約有900幾樣。首先,我哋多數會chill bar,即係用最快嘅方法冷凍乘客啲飲料,特別係啤酒同白酒。然後就以神速做埋其他嘅幾百樣工作,所以在機艙上,我哋經常會用大象奔跑嘅形式跑來跑去。

當所有工作完成後,大家披頭散髮之際,就會係乘客上機嘅時間。呢個時候,我會爭取衝入最就近嘅洗手間,整理一下個頭,拎支唇膏補補個嘴,行返出去,尊貴嘅客人已經喺你面前。「good morning,welcome on board」笑到4萬咁口,噢,這其實也是第2個elegant的moment!

飛機take off後,又有900幾樣工作等住大家。當空姐收到通知可以起身工作時,就會行去自己所屬的galley(不要再問galley是什麼,解釋咗都冇用,總之係我哋工作的地方),開始一般嘅準備工作。但就在這短短嘅路程上,你會遇上無數嘅突發情況:

「可唔可以俾氈我?」
「可唔可以要多個枕頭?」
「可唔可以要副啤牌?」
「可唔可以俾多張form我?」
「可唔可以俾支筆我?」
「可唔可以俾杯水我(再露出『如果我依家無水飲就會渴死』嘅表情)」
「電視機睇唔到嘅,可唔可以幫我整整佢?」
「張櫈唔郁嘅,可唔可以幫我搞搞佢?」

雖然你是尊貴嘅客人,但又可唔可以有禮貌地講聲「唔該」呢?「沒有誰該對誰如此地畢恭畢敬。」呢句話係我之前喺一本書裡面睇到嘅,送俾從事服務業嘅各位同仁。唔好意思,講到呢啲位,係會有少許激動,入返正題先。

一時間收到眾多嘅要求後,我又要再次以大象奔跑嘅形式在機艙上「奔走」(只能「奔走」,不能「奔跑」,因為我們是elegant的)。而由於本人嘅盆骨未夠細,飛機條走廊有幾闊大家有目共睹,因此有時我係會唔小心撞到乘客嘅頭,sorry,我都唔想㗎,邊個叫您瞓到咁樣?在此,我對曾經被我撞到頭嘅的您致萬二分歉意。

然後,終於到了重頭戲──派餐。首先我一定要講,其實架餐車真係好鬼重,所以呢個時候我哋會發揮力的表現。機尾拉上機頭?得!沒問題!

但都係嗰句,有時唔小心撞到乘客啲膝頭同手臂,我都唔想㗎,都說了「mind your elbows,mind your knees」。在此,我對曾經被我撞到膝頭同手臂的您,再致萬二分歉意。

時間慢慢過去,終於來到after landing,當然最令人振奮。雖然此時我們已經「頭甩髻甩」,妝容不再,但唔緊要,放工大過天呀嘛!即使您喺呢程機幾咁多要求,幾咁無禮貌,我黑咗你幾多次面都好,當尊貴嘅客人準備離開機艙的一刻,「thank you so much,have a nice day,bye bye」再笑到4萬咁口,呢個係第3個,亦係最後1個elegant的moment!

所以有時聽到有人話空姐好elegant,我個心都虛一虛,再諗諗,自己喺飛機上個樣,我只係聯想到elephant。(Angelina)

(《蘋果日報》圖片)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年1月25日 下午1:30

發表評論

讀取中…
丘偉華網誌│毓民與蕭生早已告訴大家的事