新聞短打│「提早」禁入境 黑名單外泄 菲國徒再自揭官僚粗疏

Fye網誌│董伯伯的不死身

2014-11-21 21:25
字體: A A A

唔知大家見到呢位「慈祥」老伯會諗起啲咩?腳痛?八萬五?定係「你好我好大家好」?很奇怪,我會諗起日本著名恐怖漫畫家伊藤潤二。

伊藤潤二是日本恐怖漫畫大師,鍾意睇恐怖漫畫的朋友唔會唔識。伊藤潤二獨特的畫風及故事可算是日本恐怖漫畫的經典,其中如《至死不渝的愛》、《富江系列》及《漩渦》等作品不單是經典,更屢次被電影化和電視化。而啱啱提及的「慈祥」老伯令我想起的就係富江。

當然,富江絕對不是老伯,相反,她是一位外表看似高中生的美女(假設說她是美女……)。日本高中生再加上是美女,當然會令一眾男士為之瘋狂。富江會令身邊的男性產生瘋狂的迷戀、妒忌心及佔有慾,然後因為種種原因變得殘酷暴力,最後會不約而同殘殺及肢解富江。

而富江同董伯伯一樣生命力極強,每次被肢解後,各部位會各自重新組成一個新富江……然後新富江會再令其他人殺死她們、肢解她們……然後再分裂……再被殺……再分裂……而富江流出的血,可以依附在其他人身上成為另一個富江……或者依附在地毯上變成地毯富江……

這就是伊藤潤二的富江系列,總之你會不停見到富江,然後欣賞她被殺死肢解,然後她下一集分裂後又再同大家見面,之後又係被殺死肢解,直到永遠……

P1121-02

幸好,董伯伯應該資歷未及富江,所以魔力未能令人想肢解佢,最多只係想肢解部電視,而聰明的我深明被肢解的電視不會變成兩部電視的道理,所以每次都只係乖乖地睇董伯伯自我分裂。腳痛後分裂成政協,然後變成做西瓜的智庫。仲要唔止董伯伯,個西瓜智庫的成員有幾個都同董伯伯一樣都有不死身。

「廿三條」推手孽瘤、因干預學術自由,被裁定「行為不當」後辭職的飯焦、「品格高尚」的蟲蟲,有誰當年不是黯然退下來?「十年人事幾番新」這句說話一定係假!佢哋現在一個係立法會議員、一個係行會成員、一個可能會被「造王者」董伯伯推上去做下屆特首。所以除非話佢哋同富江一樣有不死身,識無限復活,否則我真係理解唔到點解不夠十年,佢哋可以全部返晒黎。大佬呀,投胎都無咁快!

常說香港人善忘,所言甚是。我明,689賤到一個人見人憎的地步已經係無人能及,但大家千祈千祈要記得記得,當初推薦689的就是董伯伯,而搞到董伯伯腳痛的原因係強推「廿三條」不遂,加上為了集權而推出的「高官問責制」(但卻從來未有人被問責過)、強推教改及干預學術自由的「港大民調風波」等等數唔到咁多的PK 野,我堅係唔明點解會有人掛住董伯伯?莫非真係被董伯伯身上的富江氣息吸引咗?

ƒ
圖片說明:其實張圖同內文無咩關係,不過我最中意睇到人仆親,去到邊都要睇人仆乜乜乜。
(網絡圖片)

其實,富江系列的核突畫面並不太可怕,令人感到毛骨悚然的是,她可以令身邊原來平凡的人失去良知、失去自制能力。當你滿以為已經「攜手做瓜」這邪惡生命體之時,先至發現原來佢已經悄悄失控地蔓延……令人心寒的,或許是面對邪惡的無力感。所以見到依舊是一面慈悲為懷的董伯伯笑笑口又返咗黎,我無力到連大叫一句「你放過我啦!」的力量都已經失去。

(網絡圖片)

請支持我們持續發展,透過PayPal或其他方法贊助我們!
金額:
分類:|發表於2014年11月21日 下午9:25

發表評論

讀取中…
金鐘發言網民:大台可以不拆 堅持解散糾察