微博傳情網誌│心理測驗:你的生活還缺少什麼?

阿健

-的士佬手記

我叫阿健,的士佬一名,食塵多過你食米,揸車多個你行路。揸一轉的士,甜酸苦辣喜怒哀樂通通見齊。得閒嘅,咪上嚟聽吓我吹水囉。

阿健網誌│日光日白載著醉酒客,然後他…

2014-2-16 13:30
字體: A A A

最近網上流傳一段片,好似係小巴乘客禁區想落車被拒後,乘客拳打腳踢司機。好多人即時會諗到究竟佢地有冇打起上嚟,誰勝誰負,但作為司機,我哋反而會關心當時路面情況,車上乘客安全等等。不過今次我唔係想講車上打鬥事件,而係想話我哋呢行,真係成日遇到唔同乘客,經常會有出人意表嘅事發生。

的士司機最倒霉嘅事件之一:遇上醉酒佬。你地咪以為淨係揸夜間先遇到醉酒佬,我揸日更都遇唔少架。由上車開始已經遇到唔少問題,包括上車要去邊度都講到語無倫次,有啲車上大呼大叫,粗口滿天飛;有啲抱頭大睡,充耳不聞,都唔知點叫佢落車。

不過,最大鑊都係啲乘客嘔吐。試過有一次,個客腳步浮浮,一上車成身酒味,轉頭已經呼呼入睡,我當時都冇為意,專心揸車。點之失驚無神,一個噴泉式嘅嘔吐响我身邊擦身而過。嘩!!!好彩佢唔係坐正我後方,如果唔係,我咁大個仔都未試過用嘔吐物洗頭,講起而家都仲好嘔心!

雖然之後佢都有比番洗車費我,但其實好多人都以為個客比番洗車費就已經搞掂啦(洗車費冇規定的,通常係二、三百蚊)。但係你有所不知,我地除咗要洗車用咗唔少時間外,基本上全日唔可以再開工,因為車上啲氣味成幾個鐘都未散,根本就做唔到生意。仲有,我好彩收到錢就話啫,相信為咗呢個洗車費,乘客與司機大打出手嘅新聞,大家過去都睇唔少啦。

講笑咁講,政府時時呼籲揸車就咪飲酒,我喺度都奉勸香港市民飲少啲啦,好傷身架。(阿健)

(圖片說明:的士載客,總會遇上各式各樣的客人。)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年2月16日 下午1:30

發表評論

讀取中…
Angelina網誌│機師點樣食空姐?