熱血公民追擊李偲嫣 大埔爆衝突

陳建平網誌│古巨基最失敗的一次演出

2015-2-1 17:51
字體: A A A

上次我在這裏讚過古巨基唱《情人》,因為佢真係好適合唱呢啲感情細膩的歌曲,聽得好舒服。我當時仲講咗一句:「好彩佢冇撚聲」。

點知俾我開口中,今個星期佢就即刻撚聲,好難聽,救命。

首先必須讚賞一句的是,自從參與大陸節目《我是歌手3》後,古巨基身體力行捍衛廣東話,堅持是梅花間竹咁一集普通話歌、一集廣東話歌去唱。上集以普通話唱完五月天的《突然好想你》,今集就輪到張國榮的廣東歌《Monica》。

有聽開古巨基的人都知,基本上快歌係佢的死穴,例如《勁歌金曲3 Party King》就係一個大災難。坦白說,佢幾乎從來無一首快歌係成功的(《至net小人類》除外)。所以要唱《Monica》本已很危險,點知佢仲要自殺。

第一,件衫紫紅色閃閃下咁,真係好核突,加上副黑超、細路仔咁的表情、同埋老套到爆的舞步(李龍基都型過佢),超級有強國味道,十足去東莞登台的三線奀星咁。堂堂一個古巨基,點解要咁樣玩自己呢?第二,就係撚聲!成首歌好似含住粒核咁唱,發音非常奇怪,而且將第五聲的「我」字和「你」字,讀做第三聲,變成好似「哦」同「利」咁,真係好乞人憎,最憎佢咁樣唱歌。

整體而言,成個表演在視覺上是失敗,聽覺上也令人失望,是他參加《我是歌手3》以來最差的一次,但咁樣都竟然排名第3,實在是痴線的。

因為心理上唔多平衡,所以我最後要聽番首基仔好聽的歌彌補下。在此送上一曲《心亂如麻》,亦重申一次,其實我都係古巨基半個fans,愛之深責之切。

P.S. 古巨基自己都有一首慢歌《Monica》,好聽好多:

請支持我們持續發展,透過PayPal或其他方法贊助我們!
金額:
分類:|發表於2015年2月1日 下午5:51

發表評論

讀取中…
民陣公布今日遊行人數 不及預期