言輕網誌│政府打壓小販的邏輯謬誤

852郵報新年鉅獻-十大新聞人物最啱食賀年食品

2015-2-21 16:01
字體: A A A

新年到,大家係咪已經食咗N餐呢?查實,城中政壇人物經過過去不平凡嘅一年,相信都要擦餐勁減減壓。《852郵報》就特別為10個去年常見於新聞的單位,送上最具代表性嘅賀年食品。唔講咁多,開餐!

1. 葉劉淑儀(瑞士糖)
行政會議成員葉劉淑儀個瑞士銀行戶口早前被黑客盜取50萬,多得銀行落力狂追,終能尋回款項,總算避過損失。網絡安全呢家嘢真係一定要好小心,但既然葉劉今次咁好彩,一於奬佢食瑞士糖定定驚,兼畀多幾粒你傍身:若然瑞士銀行再打嚟,就食粒糖定神,然後先接電話,知冇?

2. 劉江華(瓜子)
毫無疑問,瓜子係其中一樣最受歡迎嘅賀年食品。之但係唔少人食完就隨手將啲瓜子殼通處掉,十分討厭!不過香港有一個人係絕對唔會咁做嘅,佢就係──政制及內地事務局副局長劉江華!
「阿劉副局長,你想要紅瓜子定黑瓜子?你唔使用個口答我,你點頭或者搖頭吖!」「…………」「咁我兩樣都畀啲你啦……」

3. 蘇錦樑(蛋卷)
蘇局長今年辛苦喇,成日都要上立法會解話。偉大特首梁振英諗住整個創科局分擔一下你嘅工作,但最後都胎死腹中。一於送盒蛋卷畀你,一路睇港視一路食啦。哎呀,唔記得同你講,盒蛋卷係喺上水買,沿途被多個拖喼客撞到,啲蛋卷應該碎晒,要唔要畀隻匙羹你?

4. 梁振英(金幣+外幣朱古力)
要數政壇人物點可以數漏偉大領袖梁振英呀?梁特真係慘慘豬,年頭俾人鬧到年尾,阿女又隨時要大戰經典三級片男星,年廿八都仲要俾傳媒話佢揼人心口捐錢益個仔。好啦,俾塊朱古力金幣你呵返啦,你仲可以「開誠布公」咁向外公布,自己持有嗰五千萬英鎊,其實係朱古力咋!

5. 張建宗(藍罐曲奇)
勞工及福利局局長張建宗呢排俾傳媒扑咪扑到傻,問完拉布問亞視,以為亞視出到糧冇事,點知一個月後又要再回應。工作咗成年,抵請你食盒藍罐曲奇輕鬆吓!不過曲奇唔係重點,個罐先係:事關香港冇全民退休保障,好多老人家都會用藍罐曲奇個罐儲錢,慳得一蚊得一蚊,老來從紙(銀紙)。既然全民退保遙遙無期,或者張局長可以好似啲長者咁,搵個曲奇罐儲住錢先?

6. 學聯及港大(年糕)
港大學生會於情人節成功退出學聯,之後嶺大亦取得足夠學生聯署,發動退聯公投,理大、中大等亦陸續成立「退聯關注組」,希望能重新審視院校和學聯嘅關係。但確也有不少人關注,港大退出學聯,會嚴重削弱後者嘅代表性及龍頭地位;為免越來越多大學退聯,怕且學聯都應該準備定幾底年糕,招呼各關注組,聽聽彼此訴求同觀點,之後就可以好似年糕咁繼續黐埋一齊!

7. 湯家驊(開心果)
十分獨立特行嘅立法會議員湯家驊,之前在多個訪問中,都話痛心泛民議員欠政治智慧,中央同泛民之間欠缺互信,前者唔肯承諾2020年普選立法會,後者又拒絕同中央坐低慢慢傾,結果香港隨時在湯家驊有生之年都唔會有普選。嘩,睇得咁灰,真係要請你食開心果,開心返先。事關有理由相信,往後日子仲有大排嘢令你唔開心…

8. 李慧琼(金莎)
貴為香港唯一一位「三料」議員(區議會、立法會及行政會議),仲盛傳今年會接譚耀宗棒,做埋民建聯主席,最叻叻豬仲唔係你?食粒金莎賀一賀佢先!不過呢…香港人食開嗰隻意大利入口嘅金莎,已經俾水貨客掃返大陸七七八八喇,咁你就「袋住先」,食住深圳買嘅金莎先啦…嗱嗱嗱,你唔話得啲水貨客喎,上個禮拜你仲話啲反水貨行動係「爛仔行為」,記唔記得先!

9. 蔣麗芸(髮菜)
根據《百度百科》,髮菜具調節神經之用,為高血壓、動脈硬化及慢性支氣管等長期病患嘅理想輔助食療。且別說我咒蔣議員,佢都冇咁易俾我咒中,之不過喺情人節財委會時,蔣議員又大發神威,話啲泛民議員拉布係患上「拉布型流感」,「主席話要比足夠發言權佢哋,而家發喇,發花癲個發」。不過正如本報指出,「發花癲」實情係形容「女性因想男人過度而引起神經錯亂」,不論發言者性別為何,用一個侮辱女性嘅字嚟話人都唔係太好啦,年尾流流,發吓髮菜咪算囉,而且髮菜仲可以清熱消滯同解毒滋補。嗱,呢個就啱蔣麗芸喇!

10. 亞視員工(利是糖)
同上面啲政客食完全不同,以下的確係俾亞視全體員工嘅誠摯祝福;亞視執行董事葉家寶早前話,過年前要籌集至少3000萬元,用作支付全部員工嘅1月份薪金、小量員工舊年嘅12月份欠薪、牌費及電費。雖然到年三十晚總算搞得條數,不過2月嘅人工同埋3月嘅牌費就要再籌措,股東仲未傾掂數,而之前嘅絕世好橋「一人一股救亞視」,又俾人質疑涉及違法公眾集資,短期內都唔會再推,咁邊樹搵錢出糧俾員工呢?真係諗起到心傷。既然係咁,請咁多位亞視員工食利是糖,利利是是,希望「大家有個開開心心、有回報嘅羊年」。.

(圖片來源:蘋果日報)

請支持我們持續發展,透過PayPal或其他方法贊助我們!
金額:
分類:|發表於2015年2月21日 下午4:01

發表評論

讀取中…
852民調:新年睇咩戲?