8仔筆記│半世紀羊年效應: 67暴動興  79定前程  91民主勁  03分水嶺  今年更吃驚

陳建平網誌│《第二人生》首集觀後感:贏劇本,輸演員

2015-2-23 22:51
字體: A A A

你可能唔信,其實香港電視兩、三年前開始宣傳劇集時,我最期待的不是《警界線》,不是《三面形醫》,而是這套無咩人關心的《第二人生》。

原因好簡單,因為我好鍾意睇一些很熱血的、講兄弟情的劇集,那種看完後覺得全身充滿幹勁,很想立即去追求理想的感覺,總是會令人很痛快(當然聽朝都係要繼續準時番工)。而這種熱血的感覺,《男兒當入樽》等日本漫畫俾到你,但電視劇一直好少有,印象中只有細個睇TVB的《烈火雄心》時才feel到。所以,我很期待呢套講夾band的《第二人生》,會唔會有嗰種力量。

結果是,看完第一集後,我覺得劇本絕對有這個潛質,尤其是點題的歌詞:「為何當初竟失去理想,藉著咪高峰唱一唱,無謂再軟弱,勇敢至正常,要讓喉嚨盡量擴張」,很令人感動。每個人長大後,總會突然有一天,後悔自己年輕時候沒有盡力追求理想,於是就會開始幻想有第二個人生。

雖然題材和劇本係好,但係演員(老嗰批)真係唔得。對唔住,我甚至覺得有少少浪費咗個劇本。

如果將《第二人生》跟同樣是講夾band的TVB劇集《天與地》比較,大家就會明。在《第二人生》中,4個band友分別是劉浩龍、尹子維、鄧建明(Joey Tang)和雷有暉。值得欣賞的是,Joey Tang及雷有暉都是太極樂隊成員,真係玩樂器的專家,所以劇中夾band的畫面較有真實感;而劉浩龍始終是實力派歌手,唱起歌來也有說服力。

這一點,《第二人生》絕對是優勝於《天與地》的,因為我每次見到陳豪與黃德斌自彈自唱,都覺得假得難以接受……(反而林保怡打鼓就呃得下人)。

然而,始終這是一套劇集,音樂第二,演技才是第一。《天與地》中,三個主角緬懷過去、感慨自己背棄了理想的那份欷歔,好能夠令人有共鳴,觀眾彷彿也會投入其中。不過,睇住Joey Tang演繹無奈的感受,睇住雷有暉生意失敗時的表情,對唔住,實在好冇說服力,我完全投入唔到。尤其是雷有暉扮飲醉嗰幕,我完全feel唔到佢醉;後來佢讀出遺書時的聲線,更加係冇咩感情。結果,我認為劉浩龍已是4人中最好的1個。

反而,少年版的4位主角,演技來得自然舒服不造作,何況4個人本身都是真正band友,演得出那份兄弟情以及年輕人的率性搗蛋性格,好睇過中年版的主角多多聲。4個少年分別是ToNick主音趙善恆、Hardpack的Joseph梁健恒、Peri M 的Tim鄭彬浩和音樂人Ricksen譚晴。請大家俾多d支持佢地,我覺得佢地真係做到幾好。

最後,我想講,雖然我成篇文好似踩緊套劇咁,但其實我真心係覺得幾好睇,始終這個題材在香港電視劇中少見,而且節奏明快,剪接流暢,全實景拍攝有誠意,加上劇本真係唔錯,所以我還是推薦大家看的!如果100分係滿分,我會俾80分!

(香港電視網站截圖)

請支持我們持續發展,透過PayPal或其他方法贊助我們!
金額:
分類:|發表於2015年2月23日 下午10:51

發表評論

讀取中…
Natalie網誌│寫在深綠遊 兩年之後