黎廣德網誌│陸客消費毒癮 香港越陷越深

新聞短打│財爺Food Truck睇真D 香港真係行得成?

2015-2-25 17:57
字體: A A A

財政司司長曾俊華今日宣讀財政預算案,其中一項措施為研究將外地流行的美食車引入香港,主力售賣高質素食品;而據消息人士講,財爺呢個idea係源自去年一部荷里活電影《滋味旅程(Chef)》。咁講咗咁耐,財爺呢個滋味idea喺香港行唔行得通?

先講一下呢部對財爺咁具啟發性嘅電影先,部戲講述一個米芝蓮大廚俾餐廳炒魷,唯有開快餐車,主打快餐式美食,重新發掘廚師嘅意義之餘,亦重拾父子情。

誠然,food truck已成為美國文化的一部份,不少遊客到「花旗國」旅遊,都會特意去搵有名嘅food truck,試試其招牌名菜。不過food truck「美食化」都係近十幾年嘅事,美國Food Truck概念早在19世紀出現,真正發揚光大就要到1950年代開始,在軍營附近賣餐,其後主要服務對象為地盤、工廠工人及其他藍領一族等。就如《8里公路》入面,喺工廠捱驢仔嘅eminem,午飯時間就幫襯food truck,邊食邊同手足battle鬥rap。

到近年由於美國藍領階段減少、都市人步伐加快,午餐要幫襯快餐車,以至不少餐廳大廚自立門戶等,都令food Truck嘅產品日益精緻「美食化」,Thrillist去年就介紹過全美最好味嘅21架food truck,包括雪條、薄餅、烤芝士三文治、奶昔及漢堡包等。

問題來了,美國嘅美食food truck,都係主打美國人地道嘅快餐;若然嚟到香港,咁應該繼續賣漢堡包,還是賣地道香港美食呢?

另外,有睇開美劇嘅讀者,應該都會經常「捕獲」到food truck嘅蹤影,多數就係公園或商業區附近,主角買份快餐之後就會喺附近搵張凳坐,繼續講對白。之但係,香港邊啲商業區可以有咁多空間,容納到一架大大嘅food truck,同時附近又有足夠空間供大家開餐呢?

再者,food truck並不限於卡車類餐車,美國亦流行一種sandwich cart,本身冇引擎推動,體積較細,跟香港桂林夜市嘅木頭車外形相若。

既然財爺都話food truck都可以賣魚蛋牛雜,咁與其引入大大架嘅美食車賣高檔嘢,倒不如研究如何開拓更多空間供小商戶賣快餐,同小市民在戶外用餐?

《滋味旅程(Chef)》預告片

請支持我們持續發展,透過PayPal或其他方法贊助我們!
金額:
分類:|發表於2015年2月25日 下午5:57

發表評論

讀取中…
陳廷清網誌│愛情從來就是夢幻的