陳方安生:梁振英先生係唯一一個行政長官,係能夠左中右都得罪嘅!

法政匯思網誌│刑事定民事唔知揀咩事

2015-3-5 14:20
字體: A A A

是咁的,大嘅律師做落咗一般都會揀定做刑事定民事多啲。咁如果你問一個新入行嘅大律師,究竟第日佢想做邊瓣多啲,你估佢會點答?

圓滑啲可能咁答「有咩做咩囉,最緊要有得做!」

鬼唔知阿媽係女人咩!

不過,如果條友老實啲,個答案就好大機會係「緊係民事啦,仲使講!」

點解呢?一字咁淺,錢。

錢?!大律師唔係追求公義嘅咩,乜講錢咁傷感情呀!係,大律師係追求公義,不過大律師都要食飯,都要養妻活兒㗎陰公!第二啲唔好講,淨係每個月寫字樓交租(少則皮幾,多則幾皮),都已經唔係咁易捱。所以年年都有啲大律師頂唔住,甚至要轉行……香港有邊個唔係地產霸權嘅受害者?你懂的。

咁點解大律師做民事較易搵到食呢?一單普普通通嘅民事案件,頭頭尾尾可能兩年都未打完,中間繁複程序又多,下下都要搵律師或大律師做嘢。多咗嘢做,年資淺嘅大律師就多啲機會幫較資深嘅大律師做助手。等到你累積咗多啲經驗,就自然多案件做。加上民事案件啲客為咗錢又好為咗啖氣又好,通常疏爽少少。

至於涉及刑事案嘅大哥大姐,有錢嘅就抬住舊錢去搵資歷較深嘅大狀;冇錢嘅就搵當值律師服務或法援幫手。前者除非單嘢真係勁複雜,個當事人又肯俾錢,入行冇耐嘅大律師基本上係埋唔到身。但後者嘅問題更棘手。

首先,除非你有較資深嘅大律師照住你,又或者個當事人指定要你,法援好少會派案件俾三年經驗以下嘅新晉大律師。咁佢都合理嘅,事關一般法援案件都係響區域法院或以上審理,案情比較嚴重,冇番咁上下經驗,俾你都未必敢接。

當值律師服務又點呢?當值律師係由所有響當值律師名冊上有份登記嘅事務律師同大律師,排隊輪流做嘅。唔好話近年真係多咗好多大律師入行,就算本身響名冊上登記咗嘅律師都唔少,僧多粥少,根本就唔夠分。依家好多時要等兩至兩個半月先做到一次當值律師,要靠佢開飯真係掹水啲。(根據路邊社消息,兩個幾月一次已經係當值律師服務盡咗力,優先俾多啲機會新人磨練下㗎喇!)

所以,有睇大台近期嗰齣法律劇集嘅朋友應該都知,唔係個個大律師都搵到食㗎,仲記唔記得有一幕有條友冇嘢做,匿埋響間房入面打機呢?呢個震撼嘅畫面忠實咁反映咗大律師,尤其係新入行嘅大律師面對緊嘅殘酷現實。如果唔係,張繼聰個前女朋友知道咗佢想改行做bar,都唔使即時變臉發晒癲咁鬧佢啦!

咁啲大狀搵唔搵到食,關大家咩事呢?

之係咁,除非身家豐厚,又或者人事脈絡一流(譬如父母開律師樓;大把刑事案件排緊隊等你去做),就算你係做刑事嘅天才,為咗搵到食都可能走鬼咗去做民事。刑事案件淪為事業發展初期嘅一個輔助收入,等到民事嗰邊做得ok,刑事就變得可有可無。

好啦,就算你叻叻豬頂得住,你好快就會發現自己跌入咗一個無限loop:你唔夠生意累積唔到經驗,所以冇人肯俾生意你,但係冇生意你始終都係不夠經驗,但係冇經驗你又搵唔到生意……

大佬,咪玩啦!冇嘢做我點累積經驗升「呢」呀呀呀呀呀!

老老竇竇,當值律師服務同法援俾律師嘅錢本身已經唔係好吸引到啲有能力、經驗豐富嘅大律師做多啲當值律師或法援,加上一個唔鼓勵叻仔叻女專攻刑事嘅制度,更加唔好話培育咩新一代刑事專才啦!

雖然係人都知刑事案件非同小可,定咗罪分分鐘監都有得坐,所以一定要有個制度為當事人提供適當嘅法律援助,嚟確保公義嘅彰顯,但係依家呢個制度,起碼係吸引人才方面嚟講,似乎就唔係好足夠喇。

今次係咁多,下次輪到我寫呢個專欄嘅時候,我會再同各位巴絲打些一些我對當值律師服務嘅一啲其他觀察。

(撰文:大狀乜乜乜@法政匯思)(圖片來源:http://speciesandclass.com/)

請支持我們持續發展,透過PayPal或其他方法贊助我們!
金額:
分類:|發表於2015年3月5日 下午2:20

發表評論

讀取中…
溫水劇場|強盜邏輯