8仔筆記│張德江指通過政改乃最高任務  暗訓張曉明梁振英勿搞小動作

陳建平網誌│滄海遺珠趙學而──《第二人生》睇到喊

2015-3-5 22:45
字體: A A A

我好耐未試過,睇香港的電視劇會睇到喊;但睇《第二人生》的趙學而,我睇到喊。

上次的blog我批評過《第二人生》是贏劇本、輸演員,尤其是Joey Tang和雷有暉的演技實在睇唔落眼。這個comment我不會收回,但睇咗8集,我覺得要作出少許修改【含劇透】:

一、我必須承認,劉浩龍的演技比我預期中好,特別是他與少年版的自己(TONICK的恆仔)演對手戲時,十分過癮,兩人有種莫名其妙的火花,將任性、無大志、處事馬虎的張旭哲演得活靈活現。

二、趙學而演技非常好。

趙學而在劇中是個可憐角色,自小喜歡劉浩龍,但劉浩龍從來無鍾意過佢,心中只有何紫綸。結果在與何紫綸分手後,喝醉了的劉浩龍與趙學而上床了,還「搞出人命」有BB,結果劉浩龍唯有迫於無奈與她結婚,但十多年來,其實從來沒有愛過趙學而一秒。

雖然趙學而盡心盡力地照顧劉浩龍及其老父老母,但在第七集中,劉浩龍始終忍唔住,決定話要離婚,趙學而則傷心到在街上暈了。

在醫院中,趙學而抱著媽媽哭,這樣說:

我真係覺得自己好冇用,咁多年我盡心盡力照顧佢地,我以為佢地冇咗我唔得,點知原來唔係,一個鐘點女傭就可取代我呀!冇人再需要我嗰種感覺,真係好難受呀阿媽……我係一個無用的人,我係一個多餘的人。

雖然我是個男人,理論上應該冇咩共鳴,但我看著她哭,自己也不禁流下淚來。我對上一次睇香港的電視劇睇到喊,應該已是以前睇《烈火雄心》群姐死嗰時試過,估唔到趙學而咁有威力。佢整個哭的過程很真實,由一開始的激動,到口震,再後來雙眼通紅,再到眼淚一滴一滴流下來,感染力非常強。

但當然,寫劇本的都寫得好,呢幾句說話好中。邊個未試過失戀?邊個失戀嗰陣唔會覺得「世界拋棄了自己」呀?「我係一個無用的人,我係一個多餘的人」,我肯定許多人都曾經咁樣諗過,在情場如是,在學校如是,在職場也如是。

講番正題,我覺得趙學而是滄海遺珠,是不可多得的好演員,以前要她在TVB拍《皆大歡喜》扮八婆實在係太浪費。希望將來王維基再開劇時也能找她,也希望將來她可參演電影,不要埋沒做戲的才華呀!

(HKTV截圖)

請支持我們持續發展,透過PayPal或其他方法贊助我們!
金額:
分類:|發表於2015年3月5日 下午10:45

發表評論

讀取中…
警方只匯報不足一成投訴個案 監警會成員:第三者投訴不算數