微博傳情網誌│心理測驗:你是超級儲錢王嗎?

阿健

-的士佬手記

我叫阿健,的士佬一名,食塵多過你食米,揸車多個你行路。揸一轉的士,甜酸苦辣喜怒哀樂通通見齊。得閒嘅,咪上嚟聽吓我吹水囉。

阿健網誌│我最唔鍾意接嘅乘客

2014-2-23 13:30
字體: A A A

今次想簡單同大家講吓,我地啲的士佬(其實係我)最唔鍾意接嘅乘客。其實本著職業操守,我地都唔會揀客。不過,有啲客真係唔太受歡迎,等

我介紹吓啦。

醉酒佬――上文都有提過,佢地語無倫次、大呼大叫、粗口、嘔吐物横飛,問你怕未。

帶寵物上車──養開小動物,佢哋嘅氣味主人已經習已為常,但其他人就未必能夠接受。佢哋一上車就有陣氣味,要忍足全程都好難頂。加上主人冇幫佢哋戴口罩,周時大吠大叫,都好騷擾揸車架。如喺車上大小便,氣味更加提升唔少。落車後仲要處理埋啲甩毛問題,清潔一番先至可以繼續開工。

流感唔戴口罩──流感高峰期人人怕怕,至弊啲人一啲意識都冇,十個有九個都唔會戴口罩。由上車到落車,打成十幾個乞嚏都唔停,包咗成打雲吞,如此我哋兩個係車上困獸鬥一輪,你話唔會交叉感染至怪啦。

用腳截的士──唔係我講,你哋都唔信真係有人用腳嚟截的士呢?我就遇過唔少啦,不過我一個都唔會接。除非你手殘,否則用腳嚟截的士,係咩態度呀!

唔識路話帶你路──其實有啲路我哋真係唔識去,都會借助啲客人帶路。但有啲懶醒嘅客,嗰頭話識,行到半路就話唔知點行。大佬,我哋揸住架車係路中心,唔係隨時可以向左走,向右走。你唔識唔緊要,早講我就打上台問吓啲行家師兄呀嘛。

大聲公──自從自由行開放以來,我聽力就開始下降。點解?每當佢哋三五知己上車高談闊論,得意忘形到好似去咗維園城市論壇一樣,聲音高八度。唔係!係紅館開演唱會一樣,幾勁呀!!

其實仲有好多好多架,有時間先同大家分享啦。(阿健)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年2月23日 下午1:30

發表評論

讀取中…
Angelina網誌│空姐眾生相