官斥警員口供不實有違操守 學生脫襲警罪警察有手尾

法政匯思網誌│公義有價──略談義務律師

2015-4-2 15:31
字體: A A A

又係我乜乜乜響度同各位巴絲打講吓做大狀嘅苦與樂喇!

喺我爆seed之前,做個免責聲明先:嗱,以下講嗰啲唔一定係真人真事㗎,甚至好大機會係老作㗎,你哋千祈唔好對號入座,如有雷同,肯肯定係你哋自己嘅問題。同埋呢,乜乜乜識嗰啲當值律師服務辦事處(學名叫「法庭聯絡處」)嘅主任呢(學名叫「CLO」 Court Liaison Officer),無一例外又專業、又負責,仲個個好似韓星咁靚仔靚女添!

好,聲明就做咗,言歸正傳先。正如上次預告咁,乜乜乜今次會講吓同刑事案有關嘅當值律師服務。咩叫當值律師?咪係響法庭提供免費法律服務嗰啲律師囉!係真唔係呀, 免費咁好死?冇老點你,真係免費。雖然準確啲講,係「幾乎」免費:任何案件第一日響裁判法院提堂,固然唔使錢,就算一日搞唔掂,只要單嘢仲響裁判法院審,佢都係收你五舊水。

咁啲服務得唔得先?細細個老豆老母就教我哋便宜莫貪,邊樹有咁大隻蛤乸隨街跳先得㗎?!查實呢,乜乜乜真係見過啲唔係好掂當嘅大狀或事務律師,是是但但隨隨便便求求其其見完個客,仲要懶得戚整句:「X!刁仔嚟嘅啫!」(刁者,當值律師洋名「Duty Lawyer」簡稱也)。呢啲唔生性嘅行家,Hea住做又有,亂咁做又有,不過畢竟係少數。老老竇竇吖,你掂唔掂當,人哋CLO有眼見㗎嘛(事關佢哋通常都跟住個律師彳亍咁轉),你跣得人兩、三次,仲敢畀你落去當值咩!

平心而論,大多數乜乜乜見過嘅當值律師,起碼做到專業,有啲甚至仲幾有熱誠添!不過咁樣係咪就代表當值律師服務嘅質素冇得頂呢?乜乜乜可以好肯定(比肯肯定仲要肯定)咁話你知,唔-係-囉!點解呢?等我講吓個(簡化咗嘅)當值律師工作流程,各位巴絲打或者就會明白。

當值律師辦事處朝早九點開門,而裁判法院一號法庭(絕大部分案件第一日提堂都係嚟呢樹)就通常10點鬆啲開庭,咁即係話你有個零鐘時間準備上庭,呢個時候個CLO版裴秀智或李敏鎬就會拎住疊快勞,安排啲被告人逐個同你開會。如果警察之前俾啲被告保釋咗,你就會響個當值律師辦事處見佢哋,如果唔係就要唔該你同個CLO落去個法院羈留室見佢哋。

見被告人前,如果你好彩,你可能有兩、三分鐘嘅時間去睇佢個快勞,咩控罪書啦、案情撮要啦、口供紙啦等等;如果你唔好彩,你就要一路睇啲文件,一路見個被告人,一路汗都唔流一滴咁「扮」你完全知道發生緊咩事。你仲要解釋埋個控罪俾個被告知,同埋個官可能會點判(呢樣嘢好多時問CLO仲清楚),跟手問埋佢認唔認罪-唔認罪就等轉頭上法庭排期審訊,如果佢認罪你就要問佢攞埋背景資料,因咩事犯法等等,陣間先可以幫佢同個官求情。

一般嚟講,你要響個零鐘入面處理7至8宗案件(有時多啲都唔出奇)。保守啲當得個7宗案件先吖,60分鐘除以7四捨五入等於9分鐘。咁即係話,每宗案件你大概有9分鐘時間處理。係呀,9-分-鐘!睇文件、見被告、俾法律意見、問認唔認罪、攞料求情再上庭,仲要上上落落走走糴糴,嗚呀~~~俾你識移形換影都唔掂啦!

好多時乜乜乜唔係話唔想花多啲時間,等阿被告問多兩條問題,講吓佢哋有咩要求顧慮,甚至聽吓佢哋嘅內心世界,唔好話咩呀,單案有冇得打,求情都求得肉緊啲啦!但係冇計,裁判法院每日都有咁多案要審,當值律師就得咁多,大家都係咁趕頭趕命,總之個被告簽晒文件同意案情話要認罪,當值律師好少會深究。所以呢,唔好話咩內心世界,乜乜乜有時見到啲情緒勁低落嘅被告想安慰兩句都冇時間。咁你話嘞,啲質素點可以唔受到影響吖!

唉,講到尾,又係錢作怪,你搵多幾個律師幫手當值,大家咪可以俾多啲時間啲被告,做好啲囉!但可惜,唔知點解香港咁有錢,起個跑道閒閒哋使個千四億,投放響刑事法律援助嘅資源,偏偏就係低過好多先進國家,而呢個亦可能係香港刑事定罪率勁高嘅原因之一。一句到尾,「快、平、好」響打刑事官司嚟講,各位巴絲打最多只可以揀兩樣,就咁!

(撰文:大狀乜乜乜@法政匯思)(圖片來源:ovguide.com)(標題經本報增刪)

請支持我們持續發展,透過PayPal或其他方法贊助我們!
金額:
分類:|發表於2015年4月2日 下午3:31

發表評論

讀取中…
新聞短打│官媒文章再稱憲法適用香港 乏法理依據無視基本法