「世越號」沉船事故一周年 家屬要求官員問責

法政匯思

-法政匯C

係唔係睇一班法律界嘅SOLIT同BAR現晒青筋講捍衛乜乜、捍衛物物有時睇到怕?其實佢哋都要搵食要行街要飲嘢要睇戲要睇電視要睇報紙要做人仔女要做人男友女友要做人老公老婆要做人老豆老母。想知佢哋唔現青筋嘅時候搞乜同諗乜?法政匯C話你知!

法政匯思網誌│一個細路嘅律師老竇

2015-4-16 14:56
字體: A A A

復活節前後,啲細路學校放假,我呢個做人老竇嘅「細嘅律師」(陳鑑林話帶假髮嗰啲係「大嘅律師」,就我自然就係「細」嗰啲囉)為咗唔好俾老婆同細路追殺,就梗係要放吓假陪佢哋啦!放假做咗好多嘢,不過今次就用睇咗「五個小孩的校長」嚟借題發揮,先講吓套戲,之後再講吓我哋呢行啲人做老竇老母嘅一啲點滴。

講到「五個小孩的校長」,就梗係要由一包紙巾開始啦!我雖然係男人老狗,但係都好鬼眼淺,喺戲院一路睇,就一路喊到成包紙巾都用Q晒。但喊還喊,我對眼仍然留意到嘅,就係好多老竇老母帶住好多人仔細細就已經戴晒眼鏡嘅細路一起嚟睇套戲。好似我老婆話齋,雖然唔係個個細路戴眼鏡都係因為學業被「谷」得好勁所致,但係一個多細路戴眼鏡嘅環境,就差唔多一定會有怪獸家長出沒。

所以,我一路睇,就一路喺度諗,究竟一個怪獸家長可以點樣將套戲喺佢哋嘅細路面前合理化?我完全可以想像,一個怪獸家長與細路睇到名校家長話覺得佢哋個仔學五、六樣課外嘢算少嗰個場面時,啲怪獸就可以同啲細路講,「嗱,都話㗎啦,學五、六樣嘢唔算多,你哋已經好好彩!」當套戲講到嗰五個學生面對嘅貧窮同惡劣學校環境,啲怪獸又可以話,「你睇吓呢啲小朋友幾可憐?你自己喺屋企乜都唔使做,食好住好,你要珍惜讀咁多書、學咁多嘢嘅機會!」到個校長鬧個補習天王嗰一幕,怪獸又可以苦口婆心咁同細路講,「其實我哋都知道你好辛苦,但係都係為咗你好,香港讀書係咁樣,我哋都唔想。」呢啲咁嘅對白,其實只要換幾隻字,就可以變成中央時常對我哋香港人嗰啲訓話!

講起怪獸家長,又好難唔講吓我哋一班有做人老竇老母嘅行家。我識嘅大多數都唔多唔少會「谷」啲細路。佢哋嘅細路學十樣八樣嘢已經算係「碎料」。我見過有行家為咗仔女可以上、下晝番唔同嘅幼稚園(通常係一間本地、一間國際),特登請司機,等佢哋啲仔女可以喺兩間幼稚園穿梭嘅時間喺架車裏面食嘢、換衫、瞓晏覺。我又識有行家差唔多年年都將放暑假而讀緊小學嘅仔女送去英美名牌大學密集式咁去狂「煲」英文及數學。仲有,唔好以為啲外籍律師一定會好啲:佢哋未必喺學業上「谷」得啲仔女咁犀利,但係佢哋通常就驚死香港冇乜地方俾細路郁動、「放電」,所以會報幾千萬樣運動俾啲細路參加。啲細路有比賽起上嚟,唔少外籍律師更會好似摩連奴上晒身咁,喺比賽場地旁邊對參賽嘅仔女呼呼喝喝!

究竟點解做我哋呢行嘅人會有咁嘅傾向?可能係入得到讀LAW嗰啲人都偏向較為好勝。亦可能係一班行家做嘢比較博殺:男律師嘅,我聽過有為咗見客連明知老婆喺醫院生緊個B都繼續做嘢;女律師嘅,我見過及聽過唔止一個喺陀B嗰陣因為有大單嘢做捱到天昏地暗,生B時都因為咁樣而生得辛苦過人。生咗出嚟之後,較多數嘅律師(尤其係男律師 – 法律界仍然係一個有性別歧視嘅行業)就會覺得需要為咗提供「最好」嘅俾下一代,所以做起嘢嚟會為咗賺多啲錢而更加博殺。所以,喺班律師連自己都chur到自己咁盡嘅環境下,又真係難怪佢哋對自己啲仔女嘅要求都會比較高。

所以,有時諗深一層,又真係覺得自己唔應該動不動就喺度話呢個係怪獸、嗰個係怪獸。大家做父母嘅可能對教細路嘅睇法唔同,但係其實我認識嘅所謂怪獸都係真心、無私咁愛佢哋啲細路,其實咁已經好足夠。有呢份真心,點都好過嗰啲好虛偽、好肉麻咁用口講話《基本法》每一隻字都代表佢哋嘅愛,但其實就只係有控制慾、佔有慾!

P.S.:至於我呢塊吉列又點呢?我唔係啲乜嘢名校出身,讀大學嗰陣又成日走堂,入到大行做律師真係我死好運。兩年前,我嗰陣仲得三歲個仔投訴話唔要我,因為我成日淨係掛住做嘢。嗰陣時我喺度諗,就算俾我喺大行做咗合夥人,做多十幾年可以執千幾萬一年又如何?到時阿仔已經大個,你想再重溫一次佢嘅成長都冇得喇。所以我唔做喺大行嗰份超長工時、超高壓嘅工,走去一間中型啲嘅行做,平時七點前放工。而家阿仔唔再話唔要我,仲會差唔多每日五點幾六點就打電話搵我,話好掛住我,叫我快啲番屋企。呢啲咁甜嘅嘢,真係有錢都買唔到!

(撰文:吉列@法政匯思)(網上圖片)(標題經本報修改)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年4月16日 下午2:56

發表評論

讀取中…
市建局中環打樁機故障 機油飛濺中小販OL