陳頌紅網誌│瑰麗幻想,誤你一生

菊戲

-新聞後欄

素無大志,自小唔知做乜,好多嘢又唔想做,誤打誤撞混入傳媒搵飯食,惜無力爭跑前線,唯有匿藏後欄,充個新聞小幫閒,權作糊口,也聊作自娛。

菊戲網誌│亞視新聞後欄王,根爺!

2015-5-9 10:01
字體: A A A

側聞葉家寶話亞視走剩500人,五百壯士之中,有位名正言順,令菊戲甘拜下下下風的新聞後欄王,根爺(左)!

人稱根哥的亞視新聞部資料室主管,係麗的呼聲(是收費有線電視,不是廣播電視)年代人物,四十幾年,根哥轉大老闆不知凡幾,但任憑風浪起,默默守在新聞部看中英會談,看六四,看回歸,看沙士,看佔中,看潮起潮落;是名實相副的「看」︰攝記在做,根哥在看,看著同事拼搏回來的點滴影片,邊看邊過帶,根哥做足幾十年,甘之如飴,換著急性子的人,那是「發條橙」式的活受罪。

記憶中根哥脾氣好好,電視新聞業者,唔理記者、編輯、剪片,趕死線急起嚟,有時莫講話等唔切,直頭可以話死唔切,可幸根哥都可以從從容容,面對燶口燶面,捱到CAST出完,大家又再嘻嘻哈哈,要做到根哥呢份修為,說易也真不易。

根哥有著上輩人特有的慳儉本性,老邱年代薪酬微薄,根哥會自掏腰包,去餅店買一大包切剩的蛋糕頭尾,俾同事作下午茶點,特區政府猛叫人咪做大嘥鬼,其實更應向根哥學習,學下點樣物盡其用。
菊戲廿零歲識根哥,今天菊戲已是入伍之年,若果唔係亞視不獲續牌,根哥真係有能力,做到菊戲登陸奔柒,都繼續做落去,無他,他以亞視為家了。

根爺,菊戲Salute You!

附記︰根哥旁邊個大隻佬,係人稱黃師傅嘅攝影記者,也是猛人。1992年,飛虎隊喺荃灣中心搜捕悍匪,悍匪以手榴彈還擊,黃師傅面無懼色,一路退一路影,呢段睇住掟榴彈的亞視獨家影片,當年威震一時。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年5月9日 上午10:01

發表評論

讀取中…
常月明網誌│送有錢大爺回府